ប្រែសម្រួល៖ ស-សម្បត្តិ

អគ្គលេខាធិការអង្គការណាតូ លោក Mark Rutte នឹងប្រើប្រាស់ដំណើរទស្សនកិច្ចរបស់លោកទៅកាន់សហរដ្ឋអាមេរិកនៅថ្ងៃព្រហស្បតិ៍ទី២៤ ខែមេសា ដើម្បីជំរុញរដ្ឋបាលប្រធានាធិបតី Donald Trump មិនឱ្យដាក់សម្ពាធលើប្រទេសអ៊ុយក្រែនឱ្យទទួលយកកិច្ចព្រមព្រៀងសន្តិភាពដែលផ្ទុយពីឆន្ទៈរបស់ខ្លួន។

ប្រភព៖ កាសែត Financial Times ដូចដែលបានរាយការណ៍ដោយ European Pravda

ព័ត៌មានលម្អិត៖ ប្រភពព័ត៌មានចំនួនបីនាក់ដែលបាននិយាយជាមួយ FT បានឱ្យដឹងថាលោក Rutte រំពឹងថានឹងជួបជាមួយរដ្ឋមន្ត្រីការពារជាតិអាមេរិក Pete Hegseth រដ្ឋមន្ត្រីការបរទេស Marco Rubio និងទីប្រឹក្សាសន្តិសុខជាតិ Michael Waltz។

ប្រភពព័ត៌មានបានឱ្យដឹងថា ប្រមុខអង្គការណាតូនឹងលើកឡើងថា មិនគួរមានកិច្ចព្រមព្រៀងសន្តិភាពណាមួយដោយមិនគិតពីផលប្រយោជន៍របស់អ៊ុយក្រែនឡើយ ព្រោះវានឹងពង្រឹងរុស្ស៊ីតែប៉ុណ្ណោះ។

លោកក៏នឹងសង្កត់ធ្ងន់ផងដែរថា ការដាក់ចេញនូវដំណោះស្រាយមួយដែលអំណោយផលជាចម្បងដល់ទីក្រុងម៉ូស្គូ អាចបង្កគ្រោះថ្នាក់ដល់សន្តិសុខរបស់អឺរ៉ុបទាំងមូល ។

«សារសំខាន់គឺការធ្វើឱ្យជនជាតិអាមេរិកយល់ពីអ្វីដែលកំពុងស្ថិតក្នុងគ្រោះថ្នាក់» អ្នកការទូតណាតូម្នាក់បានប្រាប់កាសែតដោយមិនបញ្ចេញអត្តសញ្ញាណ។

លោក Rutte ក៏នឹងពិភាក្សាផងដែរអំពីរបៀបសម្របសម្រួលឱ្យបានល្អបំផុតនូវការផ្លាស់ប្តូរបន្ទុកការពារជាតិភាគច្រើនរបស់ណាតូពីសហរដ្ឋអាមេរិកទៅកងកម្លាំងប្រដាប់អាវុធអឺរ៉ុប។

រដ្ឋបាលរបស់លោក Trump ត្រូវបានរាយការណ៍ថាបានផ្តល់ឱ្យអ៊ុយក្រែននូវឯកសារមួយទំព័រ ដែលត្រូវបានពិពណ៌នាថាជា «សំណើចុងក្រោយ» សម្រាប់កិច្ចព្រមព្រៀងសន្តិភាព នៅទីក្រុងប៉ារីសកាលពីសប្តាហ៍មុន។ ក្នុងចំណោមបទប្បញ្ញត្តិផ្សេងទៀត សហរដ្ឋអាមេរិកត្រៀមខ្លួនរួចរាល់ក្នុងការទទួលស្គាល់ការគ្រប់គ្រងរបស់រុស្ស៊ីលើឧបទ្វីបគ្រីមៀនៅអ៊ុយក្រែន និងបន្ធូរបន្ថយទណ្ឌកម្មប្រឆាំងនឹងទីក្រុងម៉ូស្គូ។

លោក Zelenskyy បានបញ្ជាក់ឡើងវិញថា អ៊ុយក្រែនមិនទទួលស្គាល់ការកាន់កាប់របស់រុស្ស៊ីលើឧបទ្វីបគ្រីមៀឡើយ ដែលនៅតែត្រូវបានទទួលស្គាល់ជាអន្តរជាតិថាជាដែនដីអ៊ុយក្រែន។

កាសែត បាននិយាយថា មន្ត្រីអឺរ៉ុបមួយចំនួនមានការព្រួយបារម្ភថា ភាពខុសគ្នាលើសំណើសន្តិភាពឯកតោភាគីរបស់លោក Trump ដែលរួមមានការទទួលស្គាល់របស់សហរដ្ឋអាមេរិកលើឧបទ្វីបគ្រីមៀថាជាផ្នែកមួយនៃរុស្ស៊ី អាចបង្កឱ្យខូចខាតដល់សន្តិសុខឆ្លងមហាសមុទ្រអាត្លង់ទិក និងអាចរារាំងកិច្ចប្រជុំកំពូលណាតូដែលគ្រោងធ្វើនៅចុងខែមិថុនា៕